Azu Muguruzaren taldeak hirugarren garaipena jarraian lortu du Liga Femenina Endesan, Innova-tsn Leganesi irabazi ostean. Paige Robinson izan da partidako MVP-a, 19ko balorazioarekin.
Mirai Euskotrenek sendo jarraitzen du Liga Femenina Endesaren hasiera honetan. Donostiako taldeak 49-70 irabazi dio Innova-tsn Leganesi lehiaketako hirugarren jardunaldian, bi taldeen defentsako intentsitateak eta bisitarien eraginkortasunak markatutako neurketan. Azu Muguruzaren taldeak bigarren laurdenetik aurrera eraiki du aldea, eta partidaren kontrolari eutsi dio amaierara arte, hirugarren garaipena jarraian eskuratzeko.
Defentsak markatu du partidaren erritmoa
Partida bi taldeek saskira jotzeko asmoz hasi da, trantsizio azkarrek markatutako erritmoarekin. Mirai Euskotrenek kontzentrazio handiz ekin dio neurketari defentsan, eta lehen abantailak joko interiorretik lortu ditu. Hala ere, jaurtiketetan egindako hutsek aldea handitzea eragotzi dute. Lehen laurden osoan parekotasuna izan da nagusi, bi taldeek aurkariaren eraso aukerak zaildu baitituzte. Itziar Ariztimuñok, jaurtiketa libreko marratik, 9-12ko emaitzarekin itxi du lehen laurdena donostiarren alde.
Bigarren laurdena antzeko dinamikarekin hasi da, Mirai Euskotrenek saskira jotzen jarraitu duen bitartean Leganesek erantzuten saiatu baita. Pixkanaka, ordea, donostiarrek erasoan aukera hobeak aurkitu dituzte. Paige Robinsonek partidako lehen hirukoa sartu du, bisitarien aldea handitzeko, eta gipuzkoarren defentsak etxeko taldearen erasoa zailtzen jarraitu du.
Baloi berreskurapenak ere aprobetxatu ditu taldeak kontraerasora irteteko eta aukera berriak sortzeko. Imani Tate, Lara González, Gedna Capel eta Veronika Remenarová ekarpenak egiten aritu dira, eta Itziar Ariztimuñoren beste hiruko batek donostiarren abantaila sendotu du atsedenaldiaren aurretik. Mirai Euskotren bederatzi puntuko aldearekin joan da aldageletara (24-33), bigarren laurdenean partidaren erritmoa pixkanaka bereganatu ostean.
Mirai Euskotrenek partida erabakita utzi du atsedenaldiaren ostean
Atsedenaldiaren ondoren, bisitarien sentsazio onek jarraipena izan dute. Paige Robinsonek hirugarren laurdena beste hiruko batekin ireki du, eta Imani Tate erasoan protagonismoa hartzen hasi da, saskira iritsiz eta aldea handituz. Khadija Fayék ere puntu garrantzitsuak gehitu ditu. Mirai Euskotrenek abantaila handitzea lortu du intentsitate fisikoari esker, baita Madrilgo taldearen barneraketak zaildu dituen defentsari esker ere.
Leganesek partidan jarraitzeko ahalegina egin du, eta kanpoko jaurtiketekin zenbait puntu lortu ditu. Mirai Euskotrenek, ordea, erasoan erantzun du. Imani Tateren hiruko batek aldea handitu du, eta donostiarrek 37-51ko emaitzarekin itxi dute hirugarren laurdena.
Azken laurdenean, Mirai Euskotrenek kontzentrazioari eutsi dio eta partidaren kontrola mantentzeko irtenbideak aurkitzen jarraitu du. Paige Robinsonek berriro erakutsi du saskirako duen gaitasuna, eta Veronika Remenarová eta Itziar Ariztimuño ere abantailari eusten laguntzen aritu dira. Itziarren beste hiruko batek eta Lara Gonzálezen saskiratze batek azken minutuetara alde erosoarekin iristea ahalbidetu dute.
Gipuzkoarrek ondo kudeatu dituzte azken minutuak, aurkariaren susperraldirako aukerarik eman gabe, eta 49-70eko emaitzarekin itxi dute partida. Paige Robinson izan da neurketako MVP-a, 19ko balorazioarekin, eta bere jardunak denboraldi hasiera onari jarraipena ematen lagundu dio taldeari.
Garaipen honekin, Mirai Euskotrenek hirugarren garaipena jarraian lortu du Liga Femenina Endesan, eta hazten jarraitzen du denboraldiaren hasiera honetan.
Gogor, Mirai!
