Mirai Euskotrenek Spar Gironaren aurka jokatuko du igande honetan, Liga Femenina Endesako bosgarren jardunaldian, garaipenen bidera itzultzeko helburuarekin.
Mirai Euskotrenek Liga Femenina Endesako beste partida bat jokatuko du igande honetan etxetik kanpo. Azu Muguruzak zuzentzen duen taldeak Spar Girona izango du aurkari Fontajau kiroldegian, 18:30ean, lehiaketako bosgarren jardunaldian.
Ligako lehen hiru partidak irabazi ondoren, Donostiako taldeak lehen porrota jaso zuen Azulmarino Mallorca Palmaren aurka. Astebete geroago, Azu Muguruzaren taldeak sentsazio onak berreskuratu eta etxetik kanpoko garaipen berri bat lortu nahi du, lesioek baldintzatutako aurkari gogor baten aurka.
Entrenatzaileak positiboki baloratu du astean zehar egindako lana, nahiz eta bajek bost bosten aurkako egoerak lantzea zaildu duten. «Daukazunarekin entrenatzeko eta partidak horrela prestatzeko gai izan behar dugu», adierazi du.
Zailtasunak zailtasun, Spar Gironak lehiakortasuna erakutsi zuen azken jardunaldian. Horren aurrean, Mirai Euskotrenek defentsako mailari eutsi beharko dio berrogei minutuetan. Azu argia izan da: «Defentsa ezin da negoziatu». Entrenatzaileak defentsako arauak betetzearen, banakako erantzukizuna hartzearen eta akatsak murriztearen garrantzia azpimarratu du.
Partidaren erritmoa kontrolatzea ere funtsezkoa izango da. Donostiako taldeak bere jokoa ezarri eta erasoan aukerak aprobetxatu nahi ditu, bi lehiaketatan ari den eta lesioen ondorioz errotazio mugatua duen aurkariaren aurka. «Gogor aritu behar dugu, eta partidaren erritmoa guk eramatea nahi dugu, ez haiek eramatea», azaldu du Azuk.
Deialdiko albiste nagusia Irene Murua jokatzeko moduan egongo dela da. Jokalariak oraindik ez du entrenamendu oso bat osatu, baina taldeari laguntzeko prest egongo da, entrenatzaileak baieztatu duenez: «Taldeak behar duenerako prest dago».
Horrela, Mirai Euskotrenek beste erronka bati egingo dio aurre Gasca kiroldegitik kanpo, intentsitateari eutsi, defentsako sendotasuna erakutsi eta denboraldi hasieran hazten jarraitzeko garaipen berri bat lortzeko helburuarekin.
#MiraiEuskotren #BetIbaeta
